ESCUELA DE PADRES

GURASO-ESKOLA 21. SAIOA

GAIA : KOMUNIKAZIOA ( 1 )

HELBURUAK:

Gurasoak hitzezko komunikazioa eta hitzezkoa ez dena bat etortzeak duen garrantziaz jabearaztea.

METODOLOGIA :

1.- "Ez komunikatzea ezinezkoa dela", "aurpegia arimaren isla dela", "aditzaile onari hitz gutxi" eta komunikazioaren eskema abiapuntutzat hartuta eta gorputzarekin ere komunikatzen garela argi utzita, parte-hartzaile bakoitzari "gizarte-mailan onartuta" dagoen zerbait adieraziko duen keinu bat egitea eskatuko zaio.

(Aldez aurretik "ZERTAZ HITZ EGITEN DUZUE SEME-ALABEKIN?" orria erabil daiteke sarrera gisa)

(Denbora: 20’)

2.- Gardenkien laguntzarekin, "PORTAERAREKIN KOMUNIKATZEN GARA" eta "ZERTARAKO BALIO DU HITZEZKOA EZ DEN PORTAERAK?" atalak garatuko dira*

(Denbora: 20’)

2.-Bi boluntarioren laguntzarekin ondoko eszena antzeztuko da:

Juan, 16 urteko mutila, telebista ikusten ari da, ama sukaldean dago eta aita atetik sartzen da. Amak aitari ondokoa esaten dio: "Gaur Juanek zaborra jaitsi eta mahaia jarri du".

A) Aitak "Oso ongi iruditzen zait" dio, LEHOR

.Aurpegira begiratu gabe.

.Hurbildu gabe.

.Ahots-tonu lehorra, adierazkortasunik gabea.

B) Aitak "Oso ongi iruditzen zait" dio, MAITEKOR

.Bere parera makurtzen da.

.Fisikoki ukitzen du: zaplada, musua, laztana...

.Ahots-tonu maitekorra.

C) Aitak "Oso ongi iruditzen zait" dio, IRONIKO

.Eztarria garbitzen du esaten dion bitartean.

.Tonu eta jarrera isekaria.

(Denbora: 10’ )

3.- Talde txiki batean hitzezko mezua eta hitzezkoa ez dena bat etorriko ez direneko egoera bat planteatzea eta ondoren antzeztea eskatuko da (monitorea taldeetatik igaro eta antzeztu beharreko eszenak aukeratuko ditu). Denek, "Komunikazioa familian" orria hartuta, ahozko mezua eta hitzezkoak ez diren elementuak idatziko dituzte.

(Denbora: 40’ )

(* Agintzari Sozietate Kooperatiboak landutako materialetatik egokitutako testuak)

KOMUNIKAZIOA FAMILIAN

PORTAERAREKIN KOMUNIKATZEN GARA

Komunikatzen dizkiguten informazio, poz, tristura eta sentimenduekiko sentikorrak gara hitzezko espresioak, keinuak, negarra, aurpegiaren espresioa, ahotsaren tonua, gorputzaren mugimenduak, begirada eta abar entzun eta ikusten ditugulako. Gure solaskidearen jarrerak entzun, ikusi eta sentitzen ditugu eta, halaber, solaskideak gureak entzun, ikusi eta sentitzen ditu.

Portaeraren bidez komunikatzen gara, hitzezko portaerekin eta hitzezkoak ez direnekin hain zuzen ere.

Hitzezko portaera ideiak komunikatzeko edo informazioa, iritziak eta jarrerak azaltzeko, sentimenduak, adostasunak eta desadostasunak deskribatu edo adierazteko, galderak egiteko, informazioa eskatzeko, arrazoitzeko eta argudiatzeko erabiltzen da.

Komunikazio eraginkorra bermatzeko hitzezko portaeraren edukiek esplizituak izan behar dute, hau da, modu deskribatzaile eta operatibo batean eta solaskidearekiko kode komun baten arabera eman behar dira. Espresio zehaztugabeek eta orokortzeko joera dutenek (hala nola "beti zaude…", "zeurekoia zara", "zurea besterik ez duzu buruan" eta abar) komunikazioa eragozten dute.

Hitzezkoa ez den portaera ezkutaezina da. Hitzak ezkuta ditzakezu, ez hitz egitea edo hitzez ez komunikatzea erabaki dezakezu baina ezinezkoa zaizu zure aurpegi edo gorputzaren bitartez mezurik ez bidaltzea. Jarraian hitzezkoa ez den portaeraren hainbat adibide ikusiko ditugu.

Aurpegiaren espresioa: hitzezkoa ez den komunikaziorako baliabiderik garrantzitsuenetako bat da. Aurpegiaren bitartez pertsona edo egoera batekiko interesa komunikatzen dugu. Aurpegiak gauza asko adierazten digu: esandakoa ulertu den eta adostasuna lortu duen ala ez, eta edozein sentimendu edo erreakzio emozional.

Begirada harremanak ezartzeko edo ez ezartzeko gogoa eta bestelako emozioak adierazteko erabiltzen da. Bereziki garrantzitsua da solaskideari entzuten ari garela adierazteko.

Jarrerak edo posturak, hau da, esertzeko, zutik egoteko edo ibiltzeko moduak, pertsona baten egoera emozionala ez ezik, norberarekiko eta besteekiko jarrerak eta sentimenduak ere isla ditzake.

Eskuekin egindako keinuek hitzezko mezuei indarra emateko balio dute eta zenbaitetan hitzen ordez erabiltzen dira.

Solaskideen arteko hurbiltasun edo urruntasunak bien artean dagoen harreman-motari buruzko pistak ematen ditu.

Oro har, kontaktu fisikoa begikotasuna, maitasuna, afektua, beldurra eta abar adierazteko erabiltzen da. Erasoa adierazteko ere erabiltzen da.

Hitz egitean erabilitako tonuak, bolumenak eta enfasiak eragina izan dezake esandakoaren esanahian eta, beraz, ulertutakoan.

ZERTARAKO BALIO DU HITZEZKOA EZ DEN PORTAERAK?

Hitzezko mezuari indarra edo enfasia emateko. Adibidez, "kaixo" esan eta aldi berean eskuarekin agurtzean edo "ez" esan eta aldi berean mahaiari kolpe bat ematean.

Afektua adierazteko.

Bi solaskideren artean sentimenduak adierazteko.

Komunikazioa erregulatzeko: elkarrizketa batean, pertsona bakoitzak buruaren mugimendu batekin edo begiradarekin hitz egiteko gogoa adieraz diezaioke solaskideari.

Hitzen ordez erabiltzeko. Adibidez, haur edo gazte bat begirada zorrotz edo mehatxuzko baten bidez isilarazten dugunean.

Hitzezko edo ahozko mezua interpretatzeko.

KOMUNIKAZIOA FAMILIAN

"Gustatzen al zaizue nire lana?" galderari erantzuteko orduan, ez da gauza bera "Bai, oso ongi dago!" esan eta lanari arretaz begiratzen zaion bitartean harridurazko eta mirespenezko keinuak egitea eta "Bai, oso ongi dago!" esan eta, lanari erreparatu gabe, aurreko solasaldiarekin jarraitzea. Azken kasu honetan, esateko moduak adierazten duena kontuan hartuta, erantzunak "Horixe da kasurik ez egitea!" interpretazioa izango luke.

AHOZKO MEZUA

______________________________________

HITZEZKOAK EZ DIREN ELEMENTUAK

______________________________________