Komunikazio-kanpainak
Aurkibidea
Helburuak
Drogamendekotasunen arloko prebentzio-jardunetako bat informazioari lotutakoa da. Drogamendekotasunen arloko prebentzio, laguntza eta gizarteratzeari buruzko Legearen 5. artikuluan adierazten denez, "Administrazio publikoek drogamendekotasunen fenomenoari eta honen arrazoi eta ondorioei buruzko komunikazio-estrategiak sustatuko dituzte drogen kontsumoari lotutako jarrerak eta azturak aldatzeko. Halaber, komunikabideei -titulartasun publikokoei bereziki-, osasunaren aldeko iritzi-egoerak sortzen laguntzeko eskatuko diete".
Ildo honetan, eta betiere prebentzio-jardun zabalagoak osatzeko eta sendotzeko, Euskal Administrazioak (bere maila guztietan) hainbat komunikabidek eta publizitate-bidek eskainitako baliabideen erabileran oinarritutako komunikazio-kanpainak bultzatu ditu urte hauetan.
Egindako kanpainak
Jarraian, administrazioaren hainbat mailatan antolatutako komunikazio-kanpainak azalduko ditugu. Kanpaina hauen azterketatik ondoriozta daitekeenez, komunikazio-estrategiak antolatzen dituzten agenteek interes ezberdinak izan dituzte urte hauetan. Horrela, Drogamendekotasunetarako Idazkaritza gazteengan ikusten den alkoholaren neurriz kanpoko kontsumoaren prebentzioan oinarritu da, Barne Saila ere alkoholaren neurriz kanpoko kontsumoari egin dio aurre baina, kasu honetan, helburua trafikoko istripuen prebentzioa izan da. Bestalde, Osasun Sailak tabakoaren kontsumoaren prebentzioari buruzko komunikazio-ildo bat garatu du eta, azkenik, Euskal Autonomia Erkidegoko Udalek egindako komunikazio-kanpainek erantzun hurbilagoa ematen diete herritarren errealitateari eta interesei.
Drogamendekotasunetarako Idazkaritza
Cuanto menos mejor-Zenbat eta gutxiago hobe
1987. Kanpaina hau EAEko herritar guztiei zuzenduta zegoen eta, bereziki, talde jakin batzuei (gazteei, gidariei, osasun-arloko profesionalei, enpresari eta sindikatuei, komunikabideei, hezitzaileei eta abar).
-
Kanpaina honen helburu orokorra, herritarrak alkoholaren kontsumoak dakartzan ondorio negatiboez sentsibilizatzea eta prebentziorako eta ondorio horiei aurre egiteko har daitezkeen neurriei buruzko informazioa ematea izan zen.
-
Kanpainaren faserik garrantzitsuenean eta goian aipatutako lemarekin, kanpoko publizitatea (hesiak), telebista-iragarkiak, irrati-iragarkiak eta prentsa-publizitatea egin zen. Horrez gain, 500.000 liburuxka, 600.000 kartel, 800.000 pegatina, esku-egutegiak eta asteko kontsumoaren ebaluazio indibidualerako txartelak egin ziren eta kolektibo jakin batzuei zuzendutako hainbat argitalpen argitaratu ziren.
Ez baduzu erretzen, askoz hobeto-Si no fumas, mucho mejor
-
1988. Kanpaina Euskal Autonomia Erkidegoko herritar guztientzat zuzenduta zegoen.
-
Kanpaina honen helburu orokorra, herritarrak tabakoaren kontsumoak dakartzan ondorio negatiboez sentsibilizatzea eta prebentziorako eta ondorio horiei aurre egiteko har daitezkeen neurriei buruzko informazioa ematea izan zen.
-
Kanpainan sortutako eta erabilitako baliabideak askotarikoak izan ziren. Irrati eta telebista iragarki, prentsa-publizitate, hesi, kartel eta pegatinez gain, Euskadiko zinemetan emateko iragarki bat egin zen. Gainera, mediku batez, monitore batez eta furgoneta batez osatutako bi lan-talde osatu ziren. Hauen oinarrizko zeregina publizitate-materiala eta mezuaren informazioa eta edukiak herritarrei hurbiltzea izan zen.
Drogamendekotasunen prebentziorako komunikazio-estrategia Euskal Autonomia Erkidegoan
-
1989-1990. Estrategia hau herritar guztiei zuzenduta zegoen. Hala ere, jendearengana iristeko bitarteko agenteen edo gizarte-bitartekoen zeregina betetzen duten kolektiboetan zuzenean eragitea eta horien bitartez euskal herritar guztiengana iristea pentsatu zen.
-
Estrategiaren funtsezko helburua, 1998an onartutako drogamendekotasunen arloko prebentzio, laguntza eta gizarteratzeari buruzko Legean planteatu ziren prebentzio-irizpideak gizarte-mailan aplikatzea eta gizarteak bere gain hartzea izan zen. Horretarako, Legeak gai honetan kolektibo bakoitzari esleitzen dizkion erantzukizunak eta konpromisoa lortzen saiatu zen eta subjektu eta gizarte-kolektibo bakoitzaren zereginak prebentziorako gizarte-ikusmolde bat sortzeko helburuan duen garrantziaz informatu zen.
-
Komunikazio-estrategiaren euskarri gisa erabilitako materiala Drogamendekotasunei aurrea hartzeko aukera badago/las drogodependencias se pueden prevenir izeneko dibulgazio-koadernoa izan zen (kanpainaren oinarrizko edukiak agertzen ziren bertan). Era berean, publizitate-kanpaina bat jarri zen martxan ondoko esloganekin: Drogamendekotasunei aurrea hartzeko aukera badago/ las drogodependencias se pueden prevenir; denon artean askoz hobe/entre todos mucho mejor; zure esku ere badago/de ti también depende.
Eta zuk, zergatik edaten duzu?-¿Y tú, por qué bebes?
-
1992. Kanpaina, funtsean, 14 urtetik 20ra bitarteko gazteei zuzenduta zegoen. Hala ere, eragin-taldeak zirenez gero, mezua gazteekin zerikusia zuten sektoreei helarazteko ahalegina egin zen.
-
Kanpainaren bidez lortu nahi ziren helburuak, hiru Lurralde Historikoetako gazteak alkoholaren kontsumoak dakartzan eragozpen eta arazoez kontzientziatzea, erabilera alternatiboak eta bizimodu positibo eta osasungarriagoak proposatzea eta gure gizartean alkoholaren inguruan errotuta dauden azturak zalantzan jartzea izan ziren (hori guztia, neurriz kanpoko kontsumoa ahal zen neurrian saihestearren).
-
Kanpaina honetan telebista eta zinemetarako iragarkiak eta irrati-iragarkiak egin ziren eta kanpoko eta prentsako publizitatea, kartelak eta liburuxkak erabili ziren. Iragarkian hainbat dibertsio-egoera agertzen dira eta, horietan, gazteen nahia eta gazteak alkohola neurriz kanpo kontsumitzera eramaten dituen errealitatea kontrajartzen dira.
Ez izan Dolly-No seas Dolly 
-
1999. Kanpaina 14 urtetik 20ra bitarteko gazteei zuzenduta zegoen.
-
Kanpainaren helburu nagusia, gazteengan edari alkoholikoen erabileran neurritasuna edo abstinentzia aukeratzeko jarrerak sortzea eta, horretarako, lagunekin neurriz kanpo edateko ohiturari aurre egitea eta aldatzeko gogoeta bat eragitea izan zen.
-
Bideoklip moduko ikus-kodeak zituen iragarki bat, irrati-iragarkiak, kartelak, alkoholarekiko lotura neurtzeko testak eta Euskadiko hainbat herritan egindako kale-jarduera bat erabili ziren mezuak jendeari helarazteko.
Sé tú mismo-Zu zeu izan
-
2000. Kanpaina 14 urtetik 20ra bitarteko gazteei zuzenduta zegoen.
-
Kanpainaren helburu nagusia, gazteengan edari alkoholikoen erabileran neurritasuna edo abstinentzia aukeratzeko jarrerak sortzea eta, horretarako, lagunekin neurriz kanpo edateko ohiturari aurre egitea eta aldatzeko gogoeta bat eragitea izan zen.
-
Bideoklip moduko ikus-kodeak zituen iragarki bat, irrati-iragarkiak, kartelak, kamisetak eta Euskadiko hainbat herritan egindako kale-jarduera bat (Dolly's Jaiak 2000 izenarekin) erabili ziren.
